الإختلاف فالرأي ولا حتى فالسير لا يفسد للود بين المغاربة قضية !!!

نبيل هرباز

في الأيام الأخيرة تلاقيت بمهاجر بحالي فألمانيا فالشارع العام، ما سبقلياش تعرفت عليه،…لكن غير شافني ابتسم فوجهي، وقال ليا بالحرف: تبارك الله على السي نبيل ديالنا .. شكرتو …
عرفني بالإسم ديالو حميد.. طططط.. مغربي من مدينة كازا …وقال ليا : كنتابعك على اليوتوب …واش ممكن ناخد معاك شي صورة ….، قلت ليه …مرحبا على الراس والعين …خدا صورة سيلفي بالبورطابل… وقال ليا خويا نبيل بغيت ناقش معاك واحد الموضوع ..اعتادرت ليه بلطف وقلت ليه راني شوية زربان ..قال ليا ما غاديش نطول عليك ، غير دقيقة يلا كان ممكن …قلت ليه تفضل …قال ليا السي نبيل…وخا أنا من متابعيك كيف قلت ليك …لكن كنعاتب عليك انك ..ما كتناقش مشاكل المغرب الداخلية ..
وتفضح لينا بعض قضايا الفساد
…وكتكتفي فقط فالمحتويات ديالك بتلميع صورة البلاد خارجيا ..ومكتكلمش على المسؤولين الفاسدين عندنا، الشي اللي كيشجعهم يزيدو يطغاوا ….قلت ليه وأنا كنضحك …دبا حسب رأيك أنا نبيل اللي كنغطي ونشجع على الفساد فالمغرب ..قال ليا انا ما قلتش هكاك لكن.. ..قبل ما يكمل قلت ليه … شوف اخويا …انا عندي محتوى ..غادي فاتجاه معين …والوقت اللي عندي قليل … مكايكفينيش حتى نقول فيه داكشي اللي خصني نقولو كولو . عاد نزيد حوايج اخرى …كما أن الكثير من اعداء المغرب كيتابعوني ..وكيتمناوا نسيء شي نهار لبلادي باش يستشهدوا بيا فتهجماتهم، .ويسيؤوا لبلادي … أنا مكانكرش أنه كاين عندنا نواقص خص تصلح داخليا وكون ماكانش هاد المتربصين ببلادنا كنتي تلقاني انا الاول كانتكلم عليهم …لكن فنفس الوقت أنا كنعتارف بأن المغرب دار مجهود ، ومشى خطوات كبيرة فالتطور والنجاح مقارنة مع دول فالوضع ديالنا ،أو عندها إمكانات حسن من …و بخصوص النواقص… فدول العالم كلها كتعرفها ..من كبيرها لصغيرها ..و حتى زين ما خطاتو لولا وخا كتبقى نسبية …والعيوب ديالنا يلا كنت أنا مقصر فالتطرق ليها ، فالمغرب تبارك الله ما عطالش عليا ،عندو تبارك الله فجميع الميادين من الرجال والكفاءات من هم أحسن وأكفأ مني
عندوا المثقفين، والصحافيين النزهاء والسياسيين الوطنيين ، اللي قايمين بالواجب وأكثر،… كما أن المغرب بلاه الله ببعض المغرضين اللي وخا مغاربة بالإنتماء، غير هازين الفاس وكيهدمو،..
وما عاجباهم حتى حاجة فالبلاد .وهما بفعلهم كيخدموا أجندات دول معادية للوطن ..وللأسف كاينين اللي تابعهم ومزرف وخا بحسن نية ، بلا ما يعرف النوايا ديالهم .. ….
تم سولت صاحبي :
..آشنو اللي ما عاجبكش فمغرب اليوم
أ السي حميد …؟ قال ليا : …ظاهرة المحاباة… وباك صاحبي …وسياسة اللي لقاها ليلو.. ما خلاها لغيروا ….قلت ليه : متلا؟ … قال ليا شوف على سبيل المثال ناخدو غير: فوزي القجع .
..الرجل هو بوحدو باغي يضوي البلاد … شاد كاع المناصب …والمهام
….فهو وزير مكلف بالميزانية …ورئيس جامعة كرة القدم …ورئيس نهضة بركان ..وعضو فالكاف…وعضو فالفيفا ….ووووهاد الشي بزاف …، واش كاين عندنا فالمغرب غير هاد القجع؟ …واش غير هو بوحدو اللي راجل؟ …..ضحكت وقلت ليه …ملي انتاقدتي ليا القجع.فاللول .. كنت كنصحابك …كتضحك معايا … لكن ملي قلتها من نيتك ..غادي نصارحك، صحيح أن القجع ماشي بوحدو اللي راجل فالمغرب يلا كنتي طبعا كتقصد بالرجولة الذكورة ، وكاينين ملايين الذكور مغاربة ، صحيح أنه كيجمع العديد من المناصب والمهام … ….لكن اللي صحيح أيضا وما خصناش نكروه … هو أن القجع هو المغربي الذكر الوحيد …اللي وهو مسؤول على قطاع كرة القدم حقق إنجازات غير مسبوقة ….صحيح أن فعهدو …شفنا لأول مرة منتخب مغربي لكرة القدم لعب نصف نهاية كأس العالم ..وما أدراك ماكأس العالم!!! ..وبمدرب مغربي عاد !!، وهادشي ما كناش كنشوفوه حتى فالأحلام ديالنا مع اللي سبقوه …صحيح انه فعهد التسيير ديالو لكرة القدم ….
المغاربة خرجوا للشارع عن بكرة أبيهم، باش يعبروا على الفرحة ديالهم الحقيقية، ..خرجوا كاملين … من صغيرهم حتى لملكهم…وأيضا فعهد تسيير القجع شفنا الكثافة والإستمرارية فتحقيق البطولات الدولية والقارية فكرة القدم، سواء على صعيد فئات المنتخبات ، ولا الفرق الوطنية المختلفة..الشي اللي ما كناش كنشوفوه مع مسؤولين قبل منو إلا نادرا، وعلى فترات متقطعة …وأكثر من هذا …القجع قدر يسجل الإسم ديالو ويشهروا كعلامة مغربية لامعة، وقدوة ….كيتغناو به شعوب جميع الدول العربية والإفريقية ، اللي كيتمناو يمتالكو مسؤول ناجح بحالو ، وأكيد كون كانوا المسؤولين كيتباعوا بحال المدربين، واللاعبين ..كون نعسوا و نفيقوا ،والله ما نلقاوه معانا ، …كون راه شراتو شي جامعة كرة القدم فدول الخليج ولا غيرها …وما خصناش ننساو كذلك أن إسم القجع ولا كيتذكر كبعبع عند أعدائنا خوفا منه …وخا كيتاهموه بأقبح النعوت، وكيوصفوه بسلوكات غير اخلاقية .راه غير باش يعلقوا عليه جميع الهزائم ديالهم فالقطاع …وهادشي كولو حيت القجع عاصر لهم الخل فعينيهوم …..وفالختام ..حسيت بالوقت مشى عليا ..وقلت لصاحبي السي حميد …أنا كنختالف معاك فانتقادك للسي فوزي القجع …أولا لأنه مغربي ومن حقوا يشغل منصب المسؤولية فبلادو لأنه بين أنه كيستحقها …تانيا ، لأنه ناجح فالعمل ديالو ..وخصنا فالعوط اللي ننتاقدوه … ندعيوا معاه الله يوفقوا ….وأنا وخا عزيز عليا هاد الراجل فأنا عزيز عليا المغرب أكثر منو وعندي استعداد باش نكون اول واحد يطالب بالمحاسبة ديالو …يلا خان التقة ودار شي حاجة خارجة على القانون كتضر البلاد …أما غير ذلك فانا كنطلب من الله يكتر لينا فالمغرب الماركات العالية الجودة من المسؤولين من نوع صنع في المغرب …..بحال ماركة القجع ..وماركة بوريطة …وماركة عمر هلال…. وغيرهم من الرجال اللي يزيدوا بالبلاد القدام، و يعاونوا ملكها على المسؤولية الثقيلة ديالو ..الله يكون فعونو… .وبهاد الكلام سلمت على صاحبي وودعتو …بلا ما نتسنى رأيوا فالشي اللي قلت …لكن اللي لاحظت بعدما ودعتوا… هو أنني ما ختالفتش معاه فقط فالرأي …ولكن حتى فالطريق …حيت ملي تفارقنا كل واحد فينا ابتسم فوجه الآخر ..وعطاه بالظهر، ومشى فا تجاه معاكس …ومع ذلك كنقول ..أن الإختلاف فالرأي ..أوحتى فاتجاه السير، لا يفسد للود بين المغاربة قضية.