كباقي المغاربة كانسمع بشي مغنيين شعبيين ولا شيخات مشهوريين….وكانشوف مرة مرة فيديوات ديالها ولا كانطلق شي سيدي نهار الميناج الأكبر على سبيل نشر الأجواء الحماسية.
ولكن ماعمرني…ابدا… بتاتا البتة شفت شي واحد لايف.
لبارح وبمناسبة واحد اللقاء الفيسبوكي كايتنظم بمنطقة دكالة واللي المنظمين ديالو كايكرمونا فيه آخر كرم…. كانت إحدى الفقرات الفنية من أداء ديفا دكالة فتيحة بنت العريان….ماشي غافنانة شعبية عندها جمهور ولكن أغانيها كايحفظهم الكبير والصغير والسهرات ديالها تسير بذكرهم الركبان…..واي حاجة كاتغنيها كاتتشهر وكاتبقا تتعاود من طرف مغنيين شعبيين اخرين وكايحفظوها التلاميذ كثر من دروس التاريخ والجغرافية….واخر اغنية ديالها تعاودت ودارت البوز هي عندو الزين عندو الحمام….
المهم جات فتيحة بنت العريان ومعاها واحد السيد لابس كوستيم كايبري و موشتاشو كثيف وكحل….المرا واخا قصيورة ومكيورة شخشية….
غابدات تغني ووتطلق ليك واحد الحلوق ….خلات كلشي حال فمو…..صوت خطيييير….اداء مافيهش غلطة ومول الموشتاش اللي معاها كايردد تاهوا صوتو كبر منو…..وواحد البحة ياسلام ..
لمهم بقيت حالة فمي فبنت العريان ورباعتها وبلا مانشعر لقيت راسي حالة البزطام وكانعلق….
الصراحة كنت تحت سحر واحد الصوت عجيب كايطربك ويزعزعك في أن واحد.
ملي جيت للدار ونعست الليل كلو كانسمع فوذني…..واحد الغناية ديال نتيا واعرة…
فالحقيقة وفي الصراحة هاذ الغنا اللي ولا دابا ماتعرفو شعبي ماتعرفو خليجي كانعرفو راي داير بحال شي كاميلة ديال اللفت بلا لحم ماهو إلا إسهال.
جيت كانفكر كيفاش هاذ المغنيين القدام إللي مادازوش من ستار اكاديمي وستوديو دوزيم ورشيد شو اصواتهم كلهم واعرين…
الصراحة التفسير الوحيد هو انه شحال هذا باش تتشهر خاصك تغني فسهرة ديال عيد العرش فيها جيش ديال بنادم مدجج بما تيسر من ماطيشة خامجة و شلا حجر….غنيتي مزيان كان بيها راه تشبع تعلاق من ربعمية مكمشة لزرقلاف……خليتيها راه ماطيشة المخيرة تجي فيك…..اخرتك يتعلمو فيك البراهش التنياش.
من هاذ المنبر كانناشد المسؤولين على قطاع الثقافة والفن وكانطلب منهم يايرجعو فتيحة بنت العريان يا يخرجو لينا هاذوك صحاب سالا الصولد وهاضاي للتيران قبل ماتغلا ماطيشة
جان دارك
